ജെഫ് ബെസോസിനെ പിന്തള്ളി ഇലണ്‍ മസ്‌ക് ഫോബ്‌സ് അതിസമ്ബന്നന്‍; യൂസുഫലി മലയാളികളില്‍ മുന്നില്‍

2022ലെ ഫോബ്‌സ് അതിസമ്ബന്നരുടെ പട്ടിക പുറത്ത്. ആമസോണ്‍ സി.ഇ.ഒ ജെഫ് ബെസോസിനെ പിന്തള്ളി ടെസ്‌ല മേധാവി ഇലണ്‍ മസ്‌ക് ആണ് പട്ടികയില്‍ ഒന്നാം സ്ഥാനത്തുള്ളത്.റിലയന്‍സ് ഇന്‍ഡസ്ട്രീസ് ചെയര്‍മാന്‍ മുകേഷ് അംബാനിയാണ് ഇന്ത്യക്കാരില്‍ മുന്നിലുള്ളത്. പട്ടികയില്‍ പത്താം സ്ഥാനത്താണ് അംബാനി. അദാനി ഗ്രൂപ്പ് തലവന്‍ ഗൗതം അദാനി 11-ാം സ്ഥാനത്തുമുണ്ട്. മലയാളികളില്‍ ലുലു ഗ്രൂപ്പ് ചെയര്‍മാന്‍ എം.എ യൂസൂഫലിയാണ് മുന്നിലുള്ളത്.

219 ബില്യന്‍ ഡോളറാണ് ഇലണ്‍ മസ്‌കിന്റെ ആസ്തി. രണ്ടാം സ്ഥാനത്തുള്ള ബെസോസിന്റെ ആസ്തി 171 ബില്യന്‍ ഡോളറുമാണ്. ഫ്രഞ്ച് ഫാഷന്‍ ഭീമന്മാരായ ബെര്‍നാഡ് അര്‍നോള്‍ട്ട് കുടുംബം 158 ബില്യന്‍ ഡോളറിന്റെ ആസ്തിയുമായി മൂന്നാം സ്ഥാനത്തുമെത്തി. മൈക്രോസോഫ്റ്റ് സ്ഥാപകന്‍ ബില്‍ ഗേറ്റ്‌സ്(129 ബില്യന്‍ ഡോളര്‍) നാലും നിക്ഷേപ ഗുരു വാറന്‍ ബഫറ്റ്(118 ബില്യന്‍ ഡോളര്‍) അഞ്ചും സ്ഥാനത്തുണ്ട്.

90.7 ബില്യന്‍ ഡോളറാണ് അംബാനിയുടെ ആസ്തി. അദാനിയുടെ ആസ്തി 90 ബില്യന്‍ ഡോളറും. രണ്ടുപേര്‍ക്കും പുറമെ എച്ച്‌.സി.എല്‍ ടെക്‌നോളജീസ് ചെയര്‍മാന്‍ എമറിറ്റസ് ശിവ് നാടാര്‍(28.7 ബില്യന്‍ ഡോളര്‍), സെറം ഇന്‍സ്റ്റിറ്റ്യൂട്ടിന്റെ സൈറസ് പൂനാവാല(24.3), ഡി-മാര്‍ട്ടിന്റെ രാധാകൃഷ്ണന്‍ ധമനി(20), ആഴ്‌സലര്‍ മിത്തലിന്റെ ലക്ഷ്മി മിത്തല്‍(17.9), ഒ.പി ജിന്‍ഡാല്‍ ഗ്രൂപ്പിന്റെ സാവിത്രി ജിന്‍ഡാല്‍(17.7), ആദിത്യ ബിര്‍ല ഗ്രൂപ്പിന്റെ കുമാര്‍ ബിര്‍ല(16.5), സണ്‍ ഫാര്‍മസ്യൂട്ടിക്കല്‍സിന്റെ ദിലീപ് ഷങ്‌വി(15.6), കൊട്ടക് മഹീന്ദ്രയുടെ ഉദയ് കൊട്ടക്(14.3) എന്നിവരാണ് പട്ടികയില്‍ ഉള്‍പ്പെട്ട ആദ്യ പത്ത് ഇന്ത്യക്കാര്‍.

പട്ടികയില്‍ 490-ാം സ്ഥാനത്താണ് എം.എ യൂസുഫലി. 5.4 ബില്യന്‍ ഡോളറാണ് അദ്ദേഹത്തിന്റെ ആസ്തി. എസ്. ഗോപാലകൃഷ്ണന്‍(4.1 ബില്യന്‍ ഡോളര്‍), ബൈജു രവീന്ദ്രന്‍(3.6 ബില്യന്‍ ഡോളര്‍), രവി പിള്ള(2.6 ബില്യന്‍ ഡോളര്‍), എസ്.ഡി ഷിബുലാല്‍(2.2 ബില്യന്‍ ഡോളര്‍), സണ്ണി വര്‍ക്കി(2.1 ബില്യന്‍ ഡോളര്‍), ജോയ് ആലുക്കാസ്(1.9 ബില്യന്‍ ഡോളര്‍) എന്നിവരാണ് പട്ടികയില്‍ ഇടംപിടിച്ച മലയാളികള്‍.

Post a Comment

Previous Post Next Post